Prof boksdan qaytib, bunday chiroyli jang qilishini kutmagandim – Hasanboy Do'smatov – Saken Bibosinov to'qnashuvi haqida boksimiz yulduzlari qanday fikrda?

Belgradda davom etayotgan jahon chempionatidagi dunyo boks muxlislari va mutaxassislarining ko'plab bahs-munozaralariga sabab bo'lgan Hasanboy Do'smatov hamda Saken Bibosinov o'rtasidagi jang to'grisida o'zbek boksi mutaxassilarining fikrlariga qiziqdik.

Farruh Qilichev – terma jamoa murabbiyi

«Meni fikrimcha, Hasanboy jangni toza yutdi. 1-2 raundda kata ustunlik qildi. Boshqa hech qanday gap-so'z bo'lishi mumkin emas».

Fazliddin G'oibnzarov – professional bokschi

«Jangni to'liq ko'rdim . SHaxsiy fikrimcha, Hasanboy engilgani yo'q. Ozgina hakamlarning xatosi bo'ldi, deb o'ylayman. Do'smatov - tajribali, Olimpiada chempioni, hakamlar tomonidan har tomonlama bu jangga professional darajada etibor berilishi kerak edi. Avvalo, quraning o'zi xato bo'lgan. Ikkita kuchli, nomdor bokschi ilk bosqichdanoq to'qnash kelib qolgan. Hammasi yaxshilikka, shunday bo'lishi kerak ekan, bo'ldi. Hasanboy endi yana ham ko'proq mehnat qiladi, nasib qilsa. Lekin bu jangda Hasanboy mag'lub bo'lmadi».

Iqboljon Xoldarov – bokschi, terma jamoa azosi

«Nohaqlik bo'lgani yaqqol ko'rinib turibdi. Men yana nima ham derdim. 3 raund ham Hasanboy aka ustunlik qildi».

Hurshid Tojiboev – professional bokschi

«Yaxshi jang bo'ldi, albatta. Hasanboyning havaskor boksda uzoq tanaffusdan so'ng bu darajada chiroyli jang o'tkazishi juda katta yutuq. Bu jangda Hasanboy g'alaba qilgan».

Isroil Madrimov – professional bokschi

«Hasanboy aka juda chiroyli jang qildi. To'g'risini aytsam, prof boksdan qaytib bunday yuqori darajadagi jang ko'rsatadi deb o'ylamagan edim. Hasanboy aka 2-3 raundlarda ustunlik qilgandi. Lekin hakamlar hammasini boshqacha hal qildi. Meni fikrimcha, bu uchrashuvda Do'smatov g'alaba qozondi».

SARVINOZ RAXMONQULOVA tayyorladi.