Prof kikbokschilarimiz 4 ta jangdan 3 tasida g'alaba qozonishdi + FOTOGALEREYA

Kecha tunda havaskorlar o'rtasidagi final bellashuvlari yakunlanganidan so'ng navbat prof janglarga berildi. Jami 4 ta professional janglar o'tkazildi va ularning uchtasida o'zbekistonlik kikbokschilar g'alaba qozonishdi. 

Markaziy jangda hamyurtimiz Murodbek Azimov xorvatiyalik jahon chempioni Ivan Bertichga qarshi ringga ko'tarildi. Uch raund to'liq davom etgan murosasiz jangda Azimov nomdor raqibini 2:1 hisobida mag'lubiyatga uchratdi. Azimov maxsus kamar bilan birga 1000 evro mukofot pulini ham qo'lga kiritdi. 

Zagreb shahrida tug'ilgan 21 yoshli Bertich muaytay bo'yicha jahon va Evropa chempioni, kikboksingning K-1 yo'nalishida jahon chempioni hisoblanadi. Kecha u professional kikboksingda debyut jangini o'tkazdi. 

"Tilla bola" nomi ostida o'z janglarini o'tkazib kelayotgan 32 yoshli andijonlik Azimov esa professionallar o'rtasida kikboksingning K-1 yo'nalishida Osiyo chempioni, shu yil Turkiyada o'tkazilgan WAKO Lou-kik yo'nalishida jahon chempioni edi. 

Og'ir vazn toifasida kechgan yana bir qiziqarli jangda hamyurtimiz Husanxon Baratov turkiyalik Mehmet O'zerni so'nggi uchinchi raund yakunlanishi arafasida texnik nokautga uchratdi. Xalqaro toifadagi referi Temur Muhammadjonov to'rtinchi nokdaun holatidan so'ng jangni to'xtatishga majbur bo'ldi.   

Yana bir hamyurtimiz Temurbek Xolmatov misrlik Abdulloh Mandodan ustun kelgan bo'lsa, qo'l jangi bo'yicha jahon chempioni Guljahon Normatova professional kikboksdagi debyut jangida ukrainalik tajribali sportchi Mariya Belkinaga imkoniyatni boy berib qo'ydi. Mariya-Katerina Belkina 2021 yilgi jahon chempionati hamda jahon kubogi sovrindori hisoblanadi.

Suratlar muallifi - Alimurod MAMADAMINOV, o'z muxbirimiz