Qarshi shahrida Olimpiya kuniga bag'ishlangan sport tadbiri o'tkazildi

Xalqaro Olimpiya kuniga bag'ishlangan bayram tadbirlarining uzviy davomi sifatida joriy yilning 23 iyun kuni Qarshi shahrida keng ko'lamli sportni targ'ib qilish akciyasi tashkil etildi.

Mazkur akciya aholi, ayniqsa yoshlar o'rtasida sog'lom turmush tarzini keng targ'ib etish, jismoniy faollikni oshirish hamda Olimpiya harakatining insonparvarlik, do'stlik va hamjihatlik kabi yuksak qadriyatlarini ommalashtirish maqsadida o'tkazildi.

Akciya ishtirokchilari Qarshi shahri bo'ylab sport va sog'lom hayot tarafdori ekanliklarini namoyish etdilar. Tadbir davomida turli yoshdagi fuqarolar, sportchilar, trenerlar, volontyorlar hamda sport ixlosmandlari faol qatnashdi.

SHuningdek, jamoat transportlari, yirik savdo markazlari va aholi gavjum hududlarda targ'ibot tadbirlari tashkil etilib, fuqarolarga sportning inson salomatligi, hayot sifati va uzoq umr ko'rishdagi ahamiyati haqida batafsil malumotlar berildi.

Akciya doirasida ishtirokchilarga Xalqaro Olimpiya kuniga bag'ishlangan esdalik sovg'alari, maxsus qo'l tasmalari va targ'ibot materiallari topshirildi. Sana munosabati bilan turli sport chellenjlari tashkil etilib, faol qatnashchilar rag'batlantirildi.

Mazkur tadbirlar aholining sportga bo'lgan qiziqishini yanada oshirish, sog'lom va faol hayot tarzini ommalashtirish hamda Olimpiya harakatining ezgu g'oyalarini keng jamoatchilik orasida targ'ib etishga xizmat qildi.

Ilhom RAHMONOV tayyorladi