Razambek Jamalovning ustozi O'zbekiston erkin kurash terma jamoasi bosh murabbiyi bo'ldi

Xasavyurtlik 52 yoshli mutaxassis Musa Saydulbatalov erkin kurashchilarimizni navbatdagi musobaqalarga tayyorlaydi. Tez orada start oladigan jahon chempionatida ishtirok etmaydigan terma jamoamiz uchun bu yilgi musobaqalar deyarli yakunlangan. Saydulbatalovning qachon bosh murabbiy sifatida tanishtirilishi va uning boshchiligidagi ilk musobaqa qachon bo'lishi bizga hali malum emas. 

Xabarlarga qaraganda, Musa Saydulbatalovga terma jamoamizning shu kungacha bosh murabbiyi bo'lgan Olim Hikmatov yordam beradi. Saydulbatalov sportchilik faoliyatida Ukraina chempioni bo'lgan. Evropa chempionati ishtirokchisi. Erkin kurash afsonalaridan biri Buvaysar Saytievning Hasavyurtdagi maktabida murabbiylik qilib kelmoqda. 

Parij-2024 Olimpiadasi chempioni Razambek Jamalov Buvaysar va Adam Saytiev hamda Musa Saydulbatalov murabbiyligida mashg'ulotlarni o'tkazib keladi. Saydulbatalov Razambekdan tashqari Abubakar Mutaliev, Adlan Bataev, Muslim va Musa Mextixanov, Umar Mutaliev, Imran Xamidov, Xamzat Bolatov, Arbi Abakarov singari kurashchilarning ustozi hisoblanadi. 

Eslatib o'tamiz, bir muddat avval Rustam Assakalov yunon-rum kurashi bo'yicha O'zbekiston terma jamoasi bosh murabbiyi etib tayinlangan edi. Assakalov Parij-2024 Olimpiadasidan keyin sportchilik faoliyatini yakunlagandi.