Rossiyada ringga chiqqan to'rt bokschimizdan faqat birida g'alaba

Turnir doirasida to'rt nafar o'zbekistonlik charm qo'lqop ustasi ringga chiqdi. Dastlab, andijonlik SHahbozbek Tolibjonov tojikistonlik Asror Vohidovga qarshi ringga ko'tarildi. Engil vazndagi 6 raundlik jang to'liq davom etib, unda Vohidov (13-1) ochkolar hisobiga ko'ra g'olib deb topildi.

So'ngra havaskor boksda jahon chempionati sovrindoriga aylangan Saidjamshid Jafarov prof boksdagi debyut jangini  o'tkazdi. Rossiyalik Gor Oganesyanga qarshi kechgan bahsda hamyurtimiz ochkolar hisobi bilan g'alaba qozondi.

Jizzaxlik Bobousmon Baturov esa professional ringdagi beshinchi jangini britaniyalik Mishel Kingga qarshi o'tkazdi. Sakkiz raundlik jang to'liq davom etib, yakunda durang natija qayd etildi.

Hamyurtlarimiz orasidagi so'nggi jang Odiljon Aslonov ishtirokida o'tdi. Supero'rta vazn toifasidagi bokschimiz rossiyalik Nikita Zonga muddatidan oldin, 6 raundda mag'lub bo'ldi. Jang WBA Asia kamari uchun o'tkazilgandi.

SHu tariqa, RCC Boxing oqshomida ringga chiqqan to'rt nafar o'zbekistonlik bokschi 1 g'alaba, 1 durang va 2 mag'lubiyat qayd etdi.