Saida Mirziyoeva Olimpiadada qatnashgan o'zbekistonlik sportchi qizlar haqida fikr bildirdi

Tokiodagi olimpiadaning boks musobaqalarida g'oliblikni qo'lga kiritgan Tursunoy Rahimova hamda dast ko'tarish mashqida yangi Olimpiya rekordini o'rnatib, musobaqaning yakka peshqadamiga  aylangan og'ir atletikachi Muattar Nabievaning yutuqlari ko'nglimni faxr va quvonchga to'ldirdi.  

Beixtiyor Samarqandda qizlarning otalariga qilgan murojaatimni esladim. O'shanda qiz farzand dunyoga kelgan oilalarda  hech qachon afsus bilan «mayli endi, Xudo xohlasa, keyingisi o'g'il bo'lar» degan gaplar aytilmasligini tilagandim. Qiz bola ham ota-onasiga tirgak bo'lishi, ularning umidini oqlashi, nomini olamga yoyib, yurti sharafini himoya qilishi mumkin. Tursunoy bilan Muattar bunga yaqqol namunadir.

Bu sportchilarimiz kabi insonlar qizlarimizning o'zlariga bo'lgan ishonchini oshiradi, boshqalar ham orzu-umidlarini ro'yobga chiqarishi, istalgan sohada mutaxassis sifatida shakllanishi, ham sevimli ishi, ham shaxsiy hayotda birdek baxtli bo'lishi mumkinligini ko'rsatuvchi yo'lchi yulduz bo'lib xizmat qiladi.