SHinkiokushinkay karatechilarimizning Dushanbe turniridagi muvaffaqiyati + FOTOGALEREYA

Markaziy Osiyo davlatlari hamda Eron Islom Respublikasidan 6 yoshdan 15 yoshgacha sportchilar ishtirok etgan turnirda yurtimiz sport sharafini shixan 5-DAN qora belbog' sohibi Mutal Nazarov boshchiligidagi yosh karatechilarimiz himoya qilishdi. 

NUR-HAS karate markazi tarbiyalanuvchilaridan Xolboev Mirzohid 10 yoshlilar orasida 30 kg vazn toifasida oltin medal sohibiga aylandi. 45 kg vaznda tatamiga chiqqan Nazarov Muhammadali 12 yoshlilarda, Umidjonov Umarjon (28 kg) 8 yoshlilar orasida kumush medalga sazovor bo'ldi. O'n ikki yashar Abduraupov Ozodbek (+45 kg) esa bronza medali bilan taqdirlandi. 

Xalqaro musobaqa yakunida O'zbekiston va Tojikiston shinkiokushinkay karate federaciyalari o'rtasida hamkorlik memorandumi imzolandi. Unga ko'ra, ikki davlat sportchilari o'rtasida qo'shma o'quv-mashg'ulot yig'inlari, murabbiylar va hakamlar uchun seminarlar o'tkaziladi. 

G'olib va sovrindorlarni tantanali taqdirlash marosimidan so'ng Mutal Nazarov Tojikiston Respublikasi sport va yoshlar ishlari bo'yicha qo'mita rahbari Abdullo Rahmonzoda hamda mamlakat SHinkiokushinkay karate federaciyasi prezidenti Rustam Yusupovga esdalik sovg'alari topshirdi.