06 mar 11:18
Yangiliklar

Qishki sport turlari

Snoubordchimiz Butunjahon qishki universiadasi finalida chiqish qildi

Teglar : Snoubord

Rossiyaning Krasnoyarsk shahrida bo'lib o'tayotgan Butunjahon qishki universiada o'yinlarida o'zbekistonlik sportchilar ham o'z ishtirokini boshladi.

Kecha, 5 mart kuni “Sopka” deb nomlangan sport majmuasida snoubordning parallel slalom-gigant yo'nalishida bahslar o'tkazildi. Musobaqa qaydnomasida 18 davlatdan kelgan 26 erkak, 19 ayol sportchi ro'yxatdan o'tgan edi, deb xabar bermoqda Jismoniy tarbiya va sport vazirligi matbuot xizmati.

Ushbu guruhda mamlakatimiz sharafini Ekaterina Lyabina hamda Jasur Mahmudov himoya qilishdi.

Garchi, Jasur mazkur yo'nalishdagi ishtirokini kvalifikaciya bosqichidayoq yakunlagan bo'lsa-da, Ekaterina saralashdan muvaffaqiyatli o'tib, ikkinchi bosqichda ham o'z imkoniyatini sinovdan o'tkazdi. Medallar uchun kurash qizg'in kechgan final bosqichida sportchimiz rossiyalik Natalya Sobolevaga imkoniyatni boy berib qo'ydi. Yakunda aynan Natalya musobaqaning bronza medalini qo'lga kiritdi.

Bugun snoubordchilarimiz parallel slalom yo'nalishida o'z mahoratlarini namoyish etishadi.