Sog'liqni saqlash vaziri marafonda ishtirok etdi

Jahon sog'liqni saqlash tashkiloti malumotiga ko'ra, inson salomatligi 55 foiz holatda sog'lom turmush tarziga, 20 foizi ekologik muhitga, 15 foizi irsiy omillar va bor-yo'g'i 10 foizi tibbiyotga bog'liq ekan. Demak, uzoq umr ko'rish uchun sog'lom turmush tarziga rioya etish kerak.

– Hozirgi urbanizaciya davrida kamharakatlilik butun dunyoning o'tkir muammosiga aylanmoqda. Holsizlik, uyquning buzilishi, diqqat-etiborni jamlashning sekinlashishi, xotiraning pasayishi, sababsiz charchash, semizlik – bu belgilar ko'pchilikda uchraydi. Lekin kamdan-kam odam uni o'ylaydi, – deydi Sog'liqni saqlash vazirligi huzuridagi Aholining sog'lom turmush tarzini qo'llab-quvvatlash va jismoniy faolligini oshirish markazi direktori Barno Odilova. – Jahon sog'liqni saqlash tashkiloti malumotiga ko'ra, chekishdan yiliga 5 milliondan ziyod, kamharakatlilikdan esa qariyb 5,3 million odam hayotdan ko'z yumadi. Sog'liqni saqlash vazirligi fuqarolarni faol harakatga chaqirib, piyoda yurish marafonini tashkil qildi. Bunday tadbirlar bir martalik emas, balki doimiy o'tkaziladi.

Etiborli jihati, piyoda yurish barcha jismoniy mashq turlari orasida eng qulayidir. Buning uchun juda ko'p energiya sarflashning hojati yo'q, ijobiy tasiri esa juda yuqori. Yurish organizmning umumiy holatiga tasir ko'rsatadi, mushaklarni baquvvat qiladi, suyak to'qimasini mustahkamlaydi, harakatlarni muvofiqlashtirishni rivojlantiradi. Jismoniy faoliyatning bunday turi eng xavfsiz bo'lib, uni har bir kishi – o'smirdan keksagacha bemalol bajarishga qodir.

Mutaxassislarning malum qilishicha, haftasiga atigi 2,5 soatlik jismoniy faollik erta o'lim holatlarini 28 foiz, yurak kasalliklari ehtimolini esa 20 foiz kamaytirar ekan. Jismoniy faollik organizmda biosintez jarayonini faollashtiradi.