Sportimiz faxriylari hamisha ezozda!

Kecha kirib kelayotgan Navro'z bayrami munosabati bilan bir guruh faxriylarga bayram sovg'alari ulashildi.

Milliy Olimpiya qo'mitasida o'tgan tadbirda MOQ Bosh kotibi Oybek Kasimov, O'zbekiston sport faxriylari kengashi raisi Bahodir Maxsitov va uzoq yillar sportimiz rivojiga hissa qo'shgan bir guruh faxriylar ishtirok etishdi. 

Tadbir avvalida Bahodir Maxsitovich mamlakatimizda nuroniylarni doimiy ravishda qo'llab-quvvatlash, ularning holidan xabar olishdek chiroyli odat yo'lga qo'yilgani, davlatimiz tomonidan ko'rsatilayotgan g'amxo'rlik xususida to'xtalib o'tdi. 

O'z o'rnida, Oybek Omilovich atletlarimizning bugun qo'lga kiritayotgan muvaffaqiyatlari uchun o'z vaqtida fidoyilarimiz tomonidan ulkan poydevor qo'yilgani, ular yaratgan boy va katta maktab o'zbek sporti g'alabalari uchun asos bo'layotganini takidladi.

Tadbir yakunida sportimiz fidoyilariga Sport vazirligi, Milliy Olimpiya qo'mitasi va O'zbekiston Sport faxriylari kengashining pul mukofotlari ulashildi.