Stol tennisi. Urganchda O'zbekiston Kubogi musobaqasi yakunlandi

O'zbekiston Respublikasi Jismoniy tarbiya va sport vazirligining taqvim rejasiga ko'ra uyushtirilgan mazkur musobaqada mamlakatimizning 13 ta jamoasi ishtirok etdi.Ayollar o'rtasida Toshkent shahri jamoasi g'oliblikni qo'lga kiritdi. Toshkent viloyatining stol tennisi ustalari ikkinchi o'rinni egalladi. Xorazm va Andijon viloyati jamoalari uchinchi o'rin egasiga aylanishdi. Erkaklar bellashuvida Toshkent viloyati sportchilari Kubok sohibi bo'lishdi. Andijon viloyati terma jamoasi ikkinchi, Qoraqalpog'iston respublikasi va Toshkent shahri jamoalari uchinchi o'rinni band etishdi.

Jonibek Meyliev (Xorazm viloyati jismoniy tarbiya va sport boshqarmasi boshlig'i o'rinbosari): - Deyarli bir hafta mobaynida mamlakatimizning eng sara stol tennisi ustalari Urganch shahrida bahs olib borishdi. Takidlash joizki, ushbu musobaqaga barcha jamoalar munosib tayyorgarlik ko'rib kelishganini namoyon etishdi. Quvonarlisi shundaki, ular orasidan ko'plab yosh iqtidor sohiblari kashf qilindi. Mubolag'a emas, kelajakda bu istedodli sportchilar orasidan vatanimiz shanini ulug'laydigan stol tennisi ustalari etishib chiqadi. Bunga ishonchimiz komil.

Musobaqaning g'olib va sovrindorlari tegishli darajadagi diplom, medal va sovg'alar bilan taqdirlanishdi.

Stol tennisi bo'yicha O'zbekiston kubogining namunali o'tkazilishida Xorazm viloyati hokimligi, viloyat jismoniy tarbiya va sport boshqarmasi, Jismoniy tarbiya va sportni rivojlantirish jamg'armasi viloyat hududiy bo'linmasi, Urganch ixtisoslashtirilgan olimpiya zaxiralari maktab-internati, viloyat stol tennis federaciyasi hamjihatlikda ish yuritgani etiborga molikdir.

Ikrom XUDOYBERGANOV.