Sultonov va Istomin juftlik bahslarida mag'lub bo'ldi

Mukofot jamg'armasi 40 ming AQSH dollarini tashkil etuvchi musobaqada tennischilarimiz ham o'z omadlarini sinab ko'rishyapti. Yakkalikdagi ishtirokini saralash bosqichidayoq yakunlagan Denis Istomin juftlik turnirida ham mag'lubiyatga uchradi. Rossiyalik Evgeniy Karlovskiy bilan tandem hosil qilgan Denis 77 daqiqa davom etgan 1/4 finalda yaponiyaliklar - Kaito Uesugi hamda Toshihide Matsui hamkorligiga 4/6, 6/7(5) hisobida imkoniyatni boy berdi. 

Yakkalik bahslarida 1/4 finalga yo'l olgan ikkinchi raketkamiz Humoyun Sultonov ham juftlikdagi ishtirokini yakunladi. Hindistonlik Parikshit Somani bilan juftlik hosil qilgan Sultonov yarim final chiptasi uchun kechgan bahsda zimbabvelik Benjamin Lok hamda Yangi Zelandiya vakili Rubin Stetxem tandemiga 1/6, 6/3, tay-brekda 7/10 hisobida yutqazdi.