Tasmuradov va Abdullaev o'z raqiblarini bilib olishdi

Biroz avval yunon-rum kurashi bo'yicha 60 va 130 kg vazn toifalari bellashuvlariga qura tashlandi. 

Ertaga, 1 avgust kuni yunon-rum kurashida aynan shu vaznlarda saralash bahslari bo'lib o'tadi. 60 kg vaznda Rio-2016 Olimpiadasining bronza medali sovrindori Elmurat Tasmuradov, 130 kg vaznda esa o'zining uchinchi Olimpiya o'yinlariga tayyorgarlik ko'rayotgan Mo'minjon Abdullaev yurtimiz sharafini himoya qiladi. 

Qura natijasiga ko'ra, Tasmuradov 1/8 finalda asli Olmaliqda tug'ilgan, hozirda Ukraina sharafini himoya qilayotgan, jahon chempionatining bronza medali sovrindori 32 yoshli Lenur Temirovga qarshi gilamga chiqadi. Ushbu juftlik g'olibi 1/4 finalda armanistonlik Armen Melikyan yoki eronlik Nejati bilan to'qnash keladi. 

Osiyo o'yinlari g'olibi Mo'minjon Abdullaev esa 1/8 finalda estoniyalik 24 yoshli Artur Vititin bilan bellashadi. Abdullaev g'alaba qozongan taqdirda chorak finalda chililik Akosta Farna yoki tunislik Guennichiga qarshi bahs olib boradi.