Tennis yangiliklari. Humoyun bugun CHexiya turniri yakkaligida 1/4, juftlikda esa 1/2 final o'yinini o'tkazadi. Sevil Yuldashevada nima gaplar?

Ayni kunlarda CHexiyada tennis bo'yicha ITF tasnifiga kiruvchi M25 turniri bo'lib o'tmoqda. Mazkur turnirda mamlakatimizning birinchi raketkasi Humoyun Sultonov (429) ham ishtirok etmoqda. Kecha namanganlik raketka ustasi yakkalik bahslarining nimchorak final bosqichida belgiyalik Buvaysar Gadamauriga (714) qarshi kortga chiqib, 6/2, 6/1 hisoblarida g'alaba qozondi va chorak finalga yo'l oldi. Yarim final yo'lida Humoyun bugun germaniyalik Sebastian Fanselou bilan o'ynaydi. Mazkur o'yin 14:00 da start oladi.

SHuningdek, Sultonov mazkur turnirning juftlik bahslarida xorvatiyalik Babich Zvonimir bilan ishtirok etmoqda. Tennischilar kecha chexiyalik Ondrey Xonak (1548) hamda Daniel Sinyakov (1056) juftligiga qarshi kortga chiqib, 6/4, 7/6 (7:3) hisoblarida g'alaba qozonishdi. Bugun ular boliviyalik Dellien Velasko/braziliyalik Pedro Sakamoto juftligiga qarshi yarim final bahsini o'tkazadi. Uchrashuv 17:00 ga belgilangan.

Yana bir hamyurtimiz Sevil Yuldasheva (1056) esa Portugaliyadagi W40 turnirida ishtirok etayotgandi. Kecha 21 yoshli tennischimiz 1/8 final bosqichida gongkonglik Iodis CHongga (293) qarshi kortga chiqib, 3/6, 3/6 hisoblarida mag'lubiyatga uchradi.

Juftlik bahslarida chorak finalga qadar etib borgan Yuldashevadan kecha omad yuz o'girdi. U avstraliyalik Elena Michich (1120) bilan hamkorlikda o'ynayotgan edi. Kecha ular kanadalik Byanka Joli (680) hamda britaniyalik Emma Uilson (980) juftligiga qarshi kortga chiqdi va 1/6, 4/6 hisoblarida mag'lubiyatga uchradi.