Terma jamoamiz Antaliyadan Tel-Avivga etib bordi

Dunyoning 63 davlatidan jami 429 (252 erkak, 177 ayol) dzyudochi ishtirok etadigan musobaqada Ilias Iliadis murabbiyligidagi dzyudochilarimiz yurtimiz sharafini himoya qiladi. Terma jamoamiz ikki hafta mobaynida Turkiyaning Antaliya shahrida o'quv-mashg'ulot yig'inini o'tkazgan edi. Delegaciyamiz aynan Antaliyadan Tel-Aviv shahriga etib keldi va mezbonlar tomonidan barcha ishtirokchilar uchun ajratilgan Hilton mehmonxonasiga joylashdi.   

O'zbekiston terma jamoasi tarkibiga nazar tashlasak, kichik o'zgarishlar ko'zimiz tushadi. Jahon chempionatining kumush medali sovrindori SHarofiddin Lutfullaev, -73 kg vazndagi etakchi dzyudochimiz Hikmatulloh To'raev, eng og'ir vaznli vakilimiz Bekmurod Oltiboev Tel-Aviv turnirida ishtirok etmaydi. Tabiiyki, ular Antaliya yig'inida ham qatnashishmadi. Murabbiylar shtabi maslahatlashgan holda bu safargi turnirda yoshlarga imkoniyat berishyapti. Jarohatidan forig' bo'lib qaytgan Alisher Yusupov, yoshlardan SHoxruh Baxtiyorov, Jaloliddin Boynazarov tarkibni to'ldirgan.     

Tel-Aviv "Katta Dubulg'a" turnirida qatnashadigan tarkib:

-60 kg: Diyorbek O'razboev

-66 kg: Sardor Nurillaev, Muhriddin Tilovov 

-73 kg: Jaloliddin Boynazarov 

-81 kg: SHarofiddin Boltaboev

-90 kg: Davlat Bobonov

-100 kg: Muhammadkarim Hurramov

+100 kg: Alisher Yusupov, SHoxruh Baxtiyorov

Qizlar

-52 kg: Diyora Keldiyorova

-70 kg: Gulnoza Matniyazova