Tim Czyu Brayan Mendosani mag'lub etdi va WBO kamarini muvaffaqiyatli himoya qildi

Uning markaziy jangi birinchi o'rta vaznda WBO yo'nalishi bo'yicha jahon chempioni, avstraliyalik Tim Czyu va WBC Interim (vaqtinchalik) kamari sohibi, amerikalik bokschi Brayan Mendosa o'rtasida kechdi.

Jang to'liq 12 raund davom etdi va unda Tim Czyu hakamlarning yakdil qarori bilan (116-111, 116-112, 117-111) Brayan Mendosani mag'lubiyatga uchratdi. Bu g'alabasi orqali Tim Czyu o'zining WBO chempionlik kamarini muvaffaqiyatli himoya qildi.

28 yoshli Czyu avvalgi jangini iyun oyida o'tkazib, meksikalik Karlos Okamponi birinchi raunddayoq nokaut bilan mag'lub etgandi. Uning hisobida 24 ta g'alaba (17 tasi nokaut) mavjud.

29 yoshli Mendosa esa so'nggi jangini aprel oyida Sebastyan Fundoraga qarshi o'tkazib, nokaut bilan g'alaba qozongan edi. Uning hisobida 22 g'alaba (16 ta nokaut) va uchta mag'lubiyat bor.