Tokio Olimpiadasi uchun reja, hakamlik va boshqa mavzular. SHerzod Toshmatov taekvondo WTF associaciyasi raisi sifatida matbuot anjumanida qatnashdi

Bungacha mazkur lavozimda Ahmadjon Rahimov faoliyat yuritib kelayotgandi. O'z vaqtida boks sohasida faoliyat olib borgan SHerzod Toshmatov bugun o'tkazilgan hisobot-saylov konferenciyasidan so'ng matbuot anjumanida jurnalistlar savollariga javob qaytardi. 

"Bildirilgan ishonch uchun minnatdorchilik bildiraman. O'zbekistonda sportga etibor kuchli. Yurtboshimiz SHavkat Miromonovich tomonidan sportni rivojlantirish, ommaviylashtirish bo'yicha katta imkoniyatlar yaratib berilgan. O'zim bir necha yildan buyon sport sohasining ichidaman. Taekvondo associaciyasidagi kabi baza, sport zallari umuman bunday infrastrukturani yaratishning o'zi oson ish emas. Yuqori natijalarga erishish uchun bir yoqadan bosh chiqarib ishlashimiz lozim. Ajratilgan mablag'larni unumli, samarali sarflashimiz lozim. Olimpiya o'yinlariga oz vaqt qoldi. Buni barcha tushunib turibdi. Nasib etsa, o'zimiz uchun aniq bir yo'lni belgilab olamiz va o'sha reja asosida faoliyat yuritamiz", - dedi Toshmatov konferenciya davomida. 

SHundan so'ng ommaviy axborot vositalari xodimlari o'zlarini qiziqtirgan savollar bilan SHerzod Toshmatovga murojaat qilishdi. 

Har bir yo'nalishda ish olib boramiz

Sportda natija o'z-o'zidan kelmaydi. Buning uchun har bir yo'nalishda ish olib borish lozim. Selekciya ishlarini to'g'ri yo'lga qo'yib, yangi istedodlarni topish, hakamlik korpusini rivojlantirish, murabbiylar... SHuningdek, xalqaro aloqalarni ham mustahkamlash katta ahamiyat kasb etadi. To'g'ri, taekvondo sport turida bungacha ham natijalar bo'lgan. Ammo, biz yanada ko'proq ishlab, natijani yaxshilashimiz lozim. 

Hakamlik borasidagi ishlar

O'z vaqtida boksda ishlaganimda bu borada ish olib borganmiz. Aytib o'tganimdek, associaciyada har bir yo'nalishda ishlaymiz. Hakamlik sohasi ham bundan mustasno emas. Buning uchun albatta xalqaro aloqalarni mustahkamlab olishimiz lozim. Nima uchun xalqaro musobaqalarda O'zbekistondan hakam bo'lmasligi lozim? Boks bo'yicha musobaqalarda hakamimiz bor. SHuningdek, futbol bo'yicha ham fahrimiz, g'ururimiz Ravshan Ermatov bor. Uni butun dunyo taniydi. SHu sababli, taekvondoda ham o'zbekistonlik hakamlar nufuzli musobaqalarda ishlashi uchun imkoniyat yaratilishi lozim. 

Yaxshi niyat qilamiz

Boksga kirib kelganimda, Rio Olimpiadasi uchun 11 ta licenziya qo'lga kirita olishimizni xech kim tasavvur qila olmagandi. Xattoki kulishgandi. Demak, yaxshi niyat qilamiz. Ko'rsatilayotgan etibor, yaratilayotgan sharoitlardan to'g'ri foydalansak, o'z maqsadimizga erishamiz. 

Oldinda turgan maqsadlar

Eng asosiy maqsadimiz hozir Tokio 2020 Olimpiadasidir. Bundan tashqari, taekvondoni ommaviylashtirishimiz lozim. Nafaqat, Tokio 2020, balki undan keyinni ham o'ylashimiz kerak. 

Tezkorlik bilan reja tuzib olish talab etiladi

Aytib o'tganimdek, associaciya tizimidagi murabbiylar, sportchilar, hakamlar faoliyati tahlil qilinadi. Tezkorlik bilan yo'l haritasini tuzib olishimiz kerak. Taekvondo boksdan farq qiladi. Masalan, boksda janglar kun-ora o'tkaziladi. Taekvondoda esa bahslar bir kunda o'tib ketadi. Ana shularni hisobga olgan holda ish yuritamiz. Bir kunda jang o'tkazgan sportchi tezkorlik bilan tiklanishi talab etiladi. Sportchilarimizda farmakalogiyaga etiborni kuchaytirish, ularga noqonuniy bo'lmagan biologik vositalar istemolini taminlash kerak. Oldinda muhim ishlar turibdi. Bularni albatta bir o'zim uddalay olmayman. Vazifalarni barchamiz - birgalikda, bir yoqadan bosh chiqargan holda amalga oshirishimiz kerak. Biz shu haftadayoq Tokio Olimpiadasi uchun rejani ishlab chiqamiz. 

O'zgarishlar tarafdori emasman

Xatolar? Boksda ishlaganimda albatta xatolar bo'lgan. Bularni o'zim uchun belgilab olganman. Kadrlar masalasi haqida gapiradigan bo'lsak, hozircha o'zgartirish maqsadim yo'q. Ish davomida mutaxassislarni ko'rib chiqamiz. Agar ular o'z lavozimiga mos bo'lmasa ular o'zgaradi. Ishlamayotgan odam o'rniga boshqa mutaxassis jalb qilinadi. Agar ishlamasam - o'zim ham ketaman. CHunki, ishlamasdan, birovning o'rnini egallab o'tirishga haqqimiz yo'q. Umuman, men jamoamni tag-tugi bilan o'zgartirib tashlamayman. Terma jamoada murabbiylar almashinuvi? To'g'ri, terma jamoada so'nggi paytda ko'p murabbiy almashdi. Aytganimdek, men ko'p o'zgarishlar tarafdori emasman.

Aziz To'xtamurodov yozib oldi

Foto: Tolibjon Qosimov