Toni Fergyuson oltinchi mag'lubiyatidan keyin "tilga kirdi"

Bu amerikalik tajribali jangchining UFC oktagonida ketma-ket qabul qilib olgan oltinchi mag'lubiyati bo'ldi. 

"Men kecha oktagonga butun dunyoga hali hamon mavjud ekanimni isbotlash uchun chiqdim. Bu jangga o'zgacha tarzda tayyorgarlik ko'rdim. Mashg'ulot lagerim ham avvalgilaridan keskin tarzda farq qildi. Faoliyatimdagi eng yaxshi tayyorgarlik jarayonini o'tkazdim deb bemalol ayta olaman. 

Jang boshlangan paytda o'zimni hotirjam va ishonchli sezdim. Bobbi ko'zimga qo'lini suqib olishiga qadar hammasi reja asosida ketayotgandi. U bu ishni atayin qildi deb o'ylayman. Bobbi avvalgi janglarida ham raqiblariga shunday hunar ko'rsatgandi. Bu holat ko'rish holatimni pasaytirmay qolmadi. Mo'ljalni aniq olishda qiyinchilikka duch kela boshladim. SHunga qaramay, jangni davom ettirishdan bosh tortish haqida o'ylamadim. Vaholanki, shifokor mendan bir necha bor jangni davom ettirmasligimni so'radi. 

Faoliyatim davomida har qanday qiyinchilikni engib o'tishga intilganman. Bu safar ham shunday bo'ldi. Afsuski, sportda har doim ham sen o'ylagan narsalar bo'lavermaydi. Omadsizliklar sportning ajralmas bo'lagi. Ko'zimga barmog'i kirib ketganini mag'lubiyatimga bahona sifatida ham keltirmayman. Oldinga intilishda davom etaman. 

Faoliyatimni yakunlash niyatidan yiroqman. Dana Uayt, Xanter Kempbell va jamoam bilan hamkorligimni davom ettiraman. Muxlislarim, oila azolarimga katta rahmat. Ularning qo'llab-quvvatlashi meni olg'a qadam bosishga undaydi. Ertaga oftalmolog huzuriga boraman va ko'zimning holatini tekshiruvdan o'tkazaman. Keyin esa tibbiy xulosaga qarab rejalarimni tuzib olaman", - dedi Fergyuson.