Toshkent "Katta Dubulg'a" turniriga bir hafta qoldi

Kelasi haftaning shu kuni musobaqaga qura tashlash marosimi hamda matbuot anjumani tashkil etiladi. Har ikkala marosim ham onlayn tarzda o'tkaziladi.

Co'nggi malumotlarga tayanadigan bo'lsak, 5-7 mart kunlari poytaxtimizdagi muhtasham "Humo" arena saroyi mezbonlik qiluvchi musobaqada qatnashish uchun dunyoning 76 davlatidan jami 530 nafar dzyudochi ariza bergan. Ishtirokchilar turnir medallari bilan birga Tokio Olimpiadasi yo'lidagi muhim reyting ochkolari uchun tatamiga chiqadilar. Hozirgacha Toshkentga Turkiya va Franciya terma jamoalari etib kelishgan. Ertaga Misr terma jamoasining tashrifi rejalashtirilgan.   

Uch kun davomida dzyudochilar 14 ta (erkaklarda 7 ta, ayollarda 7 ta ) medallar jamlanmasi uchun bellashadilar. Musobaqa g'oliblari oltin medal va 1000 reyting ochkosiga ega bo'ladilar. Kumush medal egalari 700 ochkoni qo'lga kiritsalar, bronza medal sohiblari o'z hisoblariga 500 ochko qo'shib qo'yadilar. 

Bo'lajak musobaqada O'zbekiston terma jamoasi har bir vazn toifasida to'rt nafardan dzyudochi bilan ishtirok etadi. Reglamentga ko'ra, faqat musobaqa mezbonigiga bunday imkoniyatdan foydalanishi mumkin. Qolgan davlatlar esa har bir vaznga maksimum ikki nafardan dzyudochi qo'yish imkoniyatiga ega. Bugundan terma jamoamiz yopiq tarzda Toshkent "Katta Dubulg'a" turniriga tayyorgarlikka kirishadi.