Toshkent viloyati karatechilari Turkiyadagi musobaqadan medallar bilan qaytdi

Musobaqada 35 davlatdan to'rt mingdan ziyod yosh karatchilar g'oliblik uchun tatamiga chiqdi. Quvonarlisi, mazkur xalqaro turnirda Toshkent viloyatining Toshkent tumani sport maktabi murabbiyi Dilshod Yusupov va uning shogirdi Saidkamol Adilov hamda Bekobod shahar sport maktabi murabbiyi Hamdamjon SHodibekov va shogirdi Kamronbek Abduqayumovlar ham ishtirok etib, muvaffaqiyatli natijalarga erishdi. 

Xususan, Toshkent tumani sport maktabi tarbiyalanuvchisi Saidkamol Adilov ushbu nufuzli xalqaro turnirda bronza medalini qo'lga kiritgan bo'lsa, uning jamoadoshi bekobodlik Kamronbek Abduqayumov ham bronza medaliga egalik qildi.

Darvoqe, xabaringiz bo'lsa kerak, ushbu mahoratli karatechilar noyabr oyida Birlashgan Arab Amirligining Abu-Dabi shahrida o'tkazilgan xalqaro musobaqada oltin medallarni qo'lga kiritishgan edi. 

Ilhom RAHMONOV tayyorladi