Toshkentda stol tennisi bo'yicha "WTT Youth Contender Tashkent 2025" xalqaro musobaqasi boshlandi (FOTOGALEREYA)

Toshkent shahridagi "Humo Arena" sport majmuasida stol tennisi bo'yicha “WTT Youth Contender Tashkent 2025” musobaqasi bo'lib o'tmoqda. Ushbu nufuzli turnir Jahon stol tennisi (World Table Tennis – WTT) taqvimidan o'rin olgan bo'lib, yoshlar o'rtasidagi eng yirik xalqaro turnirlardan biridir.

Turnirda dunyoning 16 davlatidan 300 dan ziyod yosh tennis ustalari (U11, U13, U15, U17 va U19 yosh toifalarida) ishtirok etmoqda. Ular orasida Markaziy Osiyo davlatlari qatorida Janubiy Koreya, Hindiston, Angliya, Avstraliya, Eron, Ozarbayjon va boshqa mamlakatlar vakillari bor.

WTT Youth Contender turnirida ishtirok etish yosh sportchilar uchun xalqaro reytingni oshirish, WTT tasnifida yuqori o'rinlarni egallash, tajriba to'plash va kelajakda WTT Star Contender hamda Grand Smash kabi yirik turnirlarga yo'llanma olish imkonini beradi.

“Bu turnir nafaqat yosh sportchilar, balki mamlakatimizda stol tennisini yanada rivojlantirish, yosh avlodni sog'lom turmush tarziga jalb etish va O'zbekistonni xalqaro sport xaritasida o'rnini mustahkamlashga xizmat qiladi”, – dedi O'zbekiston stol tennisi federaciyasi bosh kotibi Gavharxon Muqaddasova.

“WTT Youth Contender Tashkent 2025” musobaqasi O'zbekistonda stol tennisini ommalashtirish va yosh avlodni xalqaro maydondagi nufuzli musobaqalar uchun tayyorgarligini sinab olishda muhim ahamiyatga ega. Bunday turnirlarni mamlakatimizda o'tkazish orqali yosh tennischilarimiz o'z mahoratlarini oshirish, tajriba almashish va katta sportdagi yo'llarini boshlash imkoniyatiga ega bo'ladilar.

Bellashuvlar 31 mayga qadar davom etadi. 

Musobaqaning 1-kunidan suratlarni tomosha qiling: 

FOTO: Aziz To'xtamurodov