Toshkentda yosh stol tennischilar uchun xalqaro yig'in o'tkazilmoqda

30 oktyabrga qadar davom etadigan tadbirda Eron, Qozog'iston, Qirg'iziston, Turkmaniston va yurtimizning 35 nafar 11 yoshli o'g'il-qizlari qatnashmoqda.

Mazkur haftalik iqtidorli yoshlarni saralash, ularni o'z yosh toifalarida o'tadigan Osiyo hamda jahon chempionatlari, boshqa yirik xalqaro musobaqalarga tayyorlash maqsadida har yili ananaviy tarzda o'tkazib kelinadi.

Xalqaro stol tennisi federaciyasi hamda O'zbekiston stol tennisi federaciyasi hamkorligida tashkil etilgan mazkur tadbirda Hindiston ayollar stol tennisi jamoasi bosh murabbiyi Prabxu Mamata ekspert sifatida faoliyat olib bormoqda. Mutaxassis tashkil etilgan yig'in davomida yosh sportchilarning texnikalarini kuchaytirish, ularga ushbu sport turining o'ziga xos qirralarini o'rgatish borasida o'z bilimlarini ulashmoqda.

Rejaga muvofiq, 28-30 oktyabr kunlari o'rtoqlik musobaqasi o'tkazilib, g'olib va sovrindorlarga esdalik sovg'alari taqdim etiladi.