Toshkentdagi xalqaro turnirda O'zbekiston kikboksing terma jamoasi birinchi bo'ldi + FOTOGALEREYA

Musobaqada 22 mamlakatdan 10 yoshdan 40 yoshgacha bo'lgan 2000 ga yaqin mohir kikboks ustalari medallar uchun bahs olib borishdi. Xalqaro turnirning so'nggi kuni avvaliga 10 ta vazn toifasida havaskorlar o'rtasidagi final janglari bo'lib o'tdi. 

Hamyurtlarimizdan -52 kg vaznda ringga chiqqan Nazarbek Mahmudov hindistonlik Das Ishanni, Lazizbek Begmatov (-57 kg) qozog'istonlik Talgat Bukbassarovni, Islom Tursunqulov (-67 kg) qirg'izistonlik Erlan Bayzakovni, Umar Alibekov (-71 kg) turkiyalik Hakan Karagozni, hamyurtlarimiz ishtirokidagi jangda Sulaymon Solihov (+91 kg) Bekzod Ravshanovni mag'lubiyatga uchratib, "Uzbekistan Open 2" xalqaro turniri g'olibiga aylanishdi. 

Qolgan vazn toifalarida esa iordaniyalik Aday Almaxarmen (-63,5 kg), turkmanistonlik Gochmirat Jumaniyazov (-75 kg), isroillik Yuliya Sachkova (-48 kg), qozog'istonlik Batirxan Kuandikov (-67 kg), qirg'izistonlik Adilet Bekjan uulu (-75 kg) oltin medal hamda 300 evro mukofot pulini qo'lga kiritishdi. 

Yakunda umumjamoa hisobida O'zbekiston kikbokschilari 10 ta vazndan 5 tasida g'olib chiqib, birinchi o'rinni band etishdi. Qozog'iston ikkinchi o'rinni band etgan bo'lsa, kuchli uchlikka Tojikiston terma jamoasi yakun yasab berildi. Sovrinli uchlik terma jamoalariga maxsus Kuboklar topshirildi.

Suratlar muallifi - Alimurod MAMADAMINOV, o'z muxbirimiz