Uch dzyudochimiz qatnashgan Parij "Katta Dubulg'a" turnirini nechanchi o'rinda yakunladik?

Musobaqaning so'nggi kuni o'rta va og'ir vazn toifalarida g'olib hamda sovrindorlar aniqlandi. Kechagi kun dasturidan birgina dzyudochimizning chiqishi o'rin olgandi. +100 kg vazn toifasida bahslarga kirishgan O'tkirbek To'raboev ilk davrada franciyalik raqibi Amadu Meytegani ippon bahosi evaziga mag'lubiyatga uchratdi. Ammo chorak finalda tajribali Toma Nikiforovga imkoniyatni boy berib qo'ydi. O'n daqiqa davom etgan o'tish bahsida esa omad yaponiyalik dzyudochiga kulib boqdi. 

SHu tariqa, uch nafar dzyudochi bilan qatnashgan Iskandar Rasulov murabbiyligidagi O'zbekiston terma jamoasi 1 ta oltin va 1 ta bronza medali bilan 50 davlat orasida 7-o'rinni egalladi. SHahram Ahadov turnir oltin medali hamda jahon reytingi uchun qimmatli 1000 ochkoga ega bo'ldi. Bronza medali sohibi Bahrom Boturov esa 500 reyting ochkosini o'z hisobiga yozib qo'ydi. 

Musobaqa yakunlariga ko'ra, medallar jamg'arish bo'yicha Franciya terma jamoasi 3 ta oltin, 3 ta kumush, 9 ta bronza medali bilan 1-o'rinni egalladi. Birinchi kungi bahslardan keyin peshqadamlikni qo'lga olgan Yaponiya terma jamoasi 3 ta oltin, 3 ta kumush, 5 ta bronza medali bilan 2-o'rinni band etdi. 

Koreya Respublikasi 1 ta oltin, 2 ta kumush medal bilan kuchli uchlikka yakun yasab berdi. BAA, Ozarbayjon, Ispaniya, O'zbekiston, Portugaliya va Kanada terma jamoalari safida ham bir nafardan musobaqa chempion bo'ldi. Jami 17 davlat Parij "Katta Dubulg'a" turnirining kamida 1 ta bronza medalini qo'lga kiritdi.