UFC Fight Night 231. Markaziy jang g'olibi ochkolar hisobiga ko'ra aniqlandi + FOTO

UFC Fight Night 231 oqshomining markaziy jangi og'ir vazn toifasida o'tkazilib, unda braziliyalik Jailton Almeyda hamda amerikalik Derrik Lyuis o'zaro oktagonda to'qnash kelishdi. Jang to'liq besh raund davom etdi va yakunda Almeyda hakamlarning yakdil qarori bilan g'alabaga erishdi. Jailton bugungi jangning katta qismini parterda o'tkazib, asosiy ochkolarini aynan shu vaziyatlar evaziga qo'lga kiritdi.  

Bugun Lyuis faoliyatidagi 12-mag'lubiyatini qabul qilib oldi, g'alabalari soni 27 taligicha qoldi. U bundan avvalgi jangida Markos Rojerio De Limani texnik nokaut evaziga taslim etgan edi. Yaqinda amerikalik UFC bilan amaldagi shartnomasini ham uzaytirgandi.

Almeyda esa bugun o'z hamyurtlari ko'z o'ngida faoliyatidagi 20-g'alabasini tantana qildi. Uning g'alabali seriyasi 15 ta jangga etdi. UFC promoushenidagi g'alabalari 5 tani tashkil qilmoqda. Almeyda MMAdagi so'nggi mag'lubiyatini 2018 yilda Shooto Brazil 80 turniri doirasida qabul qilib olgandi.