Ular Tokioga borishadi: Xorazmlik erkin kurashchimiz G'ulomjon Abdullaev!

G'ulomjon Ozodovich Abdullaev 1998 yil 11 noyabr kuni Xorazm viloyatida tug'ilgan. Erkin kurash bo'yicha -57 kg vazn toifasida yurtimiz sharafini himoya qiladi. Murabbiyi – Baxtiyor Sobirov.

Abdullaev xalqaro arenalardagi eng katta yutug'ini 2016 yil qo'lga kiritgan. 18 yoshida U20 yosh toifasidagi jahon chempionatida ishtirok etib, bronza medaliga sazovor bo'lgan. SHuningdek, faoliyati davomida bir qator boshqa yirik xalqaro musobaqalarda g'olib va sovrindorlar qatoridan joy olgan. Yoshlar o'rtasida Osiyo chempioni.

Sportchimiz 2016 yil yoshlar, 2018 yildan asosiy jamoaga qo'shilgan. Aytish mumkinki, Abdullaev hozirda ushbu vazn toifasida mamlakatimiz etakchisiga aylanish uchun o'ziga xos mini-turnirdan o'tishga to'g'ri keldi. -57 kgda terma jamoamiz Abdullaevdan tashqari Mahmud SHavkatov, Nodirjon Safarov, Umid Jalolov kabi mahoratli polvonlarga ega. Murabbiylar shtabi uzoq qarordan so'ng bu vaznda Abdullaev nomzodini maqul ko'rishdi va bu qaror amalda o'zini oqladi. Sportchimiz joriy yilning aprel oyida Qozog'istonda o'tgan licenzion turnir orqali Tokio-2020 Olimpiya o'yinlariga yo'llanma olgan.