Umid Ahmadjonov Seulda Osiyo taekvondo ittifoqi prezidenti bilan uchrashdi

MOQ rahbariga ushbu safar davomida O'zbekiston taekvondo WTF associaciyasi raisi Ahmadjon Rahimov hamrohlik qilmoqda. Bugun ular mamlakat poytaxti Seul shahridagi «Hyatt Park Seoul» mehmonxonasida Osiyo taekvondo uyushmasi prezidenti Li Kyu Syok bilan uchrashishdi.

Uchrashuv davomida Umid Ahmadjonov va Ahmadjon Rahimov Osiyo taekvondo ittifoqi rahbarini mamlakatimizda taekvondoni rivojlantirish dasturi, mazkur sport turi bo'yicha maktabgacha talim muassasalarida ham to'garaklar ochish rejasi bilan tanishtirishdi. Bu bo'yicha bir qator muhim masalalar muhokama qilindi. SHuningdek, janob Syok O'zbekiston Milliy universitetidagi taekvondo kafedrasiga kelib, maruza qilish uchun taklif qilindi. O'z navbatida, Osiyo taekvondo ittifoqi rahbari mazkur taklifga ijobiy javob qaytardi.

SHuningdek, rejaga binoan yanvar oyida Markaziy Osiyo taekvondo associaciyasining ochilish marosimi bo'lib o'tadi. Ushbu tadbirga Li Kyu Syok ham tashrif buyurishi kutilmoqda. Tashkil etiladigan yangi associaciya rahbarligiga O'zbekiston taekvondo WTF associaciyasi raisi Ahmadjon Rahimov asosiy nomzod bo'lib turibdi.

Bugun shuningdek kun davomida taekvondoni rivojlantirish bo'yicha yana bir necha uchrashuv o'tkazilishi rejalashtirilgan.