WBA 15-raundlik janglarga qaytishni rejalashtirmoqda

Tashkilot prezidenti Xilberto Mendosaning aytishicha, boshlanishiga ayrim muhim janglarda bu narsa sinab ko'riladi. Yakuniy qaror esa bu janglarning yakuniga qarab elon qilinadi. 

Avvalroq, birinchi yarimo'rta vazn toifasida WBO chempioni Teofimo Lopes 15 raundlik janglarni qaytarish boks jozibasini yanada oshirishi mumkinligi haqida aytgan edi. Uning fikricha, mutlaq jahon chempionlik janglari hozirgidek 12 raund emas, 15 raunddan iborat bo'lishi kerak. 

"Kelinglar, yana uchta raund qo'shamiz va biz haqiqiy chempion kimligini bilamiz", — dedi  Lopes The Ring jurnali podkasti efirida.

Bu rejaning amalga oshishi oson bo'lmaydi. Buning uchun faqat WBA emas, qolgan yana uchta asosiy tashkilot ham bu g'oyani qo'llab-quvvatlashi kerak. 

Eslatib o'tamiz, 15 raundlik janglar oxirgi martta 1982 yilda o'tkazilgan. Ungacha barcha chempionlik janglari 15 raundlik formatda tashkil etilgan. 1982 yilda WBC qaroriga ko'ra, 15 raundlik formatdan voz kechilib, 12 raundga o'tilgan. Bunga koreyalik bokschi Duk Ku Kimning o'limi sabab bo'lgandi. Duk engil vaznda WBA kamari uchun Rey Manchiniga qarshi kechgan jangning 14-raundida koma holatiga tushib qolgan va bir necha kundan keyin shifoxonada vafot etgandi.