22 may 12:54
Yangiliklar
WBC, WBA, IBF va WBO kamarlarining mutlaq egasi kim bo'ladi yoki SHohjahon va SHahram intilayotgan “cho'qqi” davogarlari
WBC va WBO chempionligiga amerikalik Xose Ramires egalik qilib kelayotgan bo'lsa, shotlandiyalik Josh Teylor IBF va WBA yo'nalishlarining “egasi” hisoblanadi.
Va nihoyat ertaga tongda AQSHning Las-Vegas shahrida to'rtta yo'nalishni birlashtiradigan mutlaq chempionlik jangi bo'lib o'tadi.
Bugun Las-Vegasda ikki sportchi uchun vazn ulchash, ko'z urishtirish va matbuot anjumani marosimlari o'tkazildi. Faoliyati mobaynida amerikalik Ramires 26 jang o'tkazib, barchasida g'alabaga erishgan. SHotlandiyalik Teylor hisobida esa 17 jang va shuncha g'alaba.
Josh Teylor jurnalistlarga bergan intervyusida raqibi va o'z imkoniyatlari haqida so'z yuritib, “bu musobaqa men uchun ham, butun SHotlandiya uchun ham tarixiy ahmiyatga ega. Agar men g'alaba qilsam, SHotlandiya tarixida professional boks bo'yicha barcha to'rt yo'nalishni birlashtirgan birinchi mutlaq chempion, degan tarixiy yutuqqa erishgan bo'lardim. Istagim ham shu”. Uning bu gaplariga AQSH bokschisi Xose Ramires hozircha keskin munosabat bildirganicha yo'q.
Ushbu jang birinchi yarim o'rta vazn toifasida hamyurtlarimiz SHahram G'iyosov va SHohjahon Ergashev munosib o'rinlarni egallab kelayotganligi sabab O'zbekiston boks ixlosmandlarining diqqat markazida turibdi. SHohjahon Ergashev IBFda TOP-5 talikda, WBA va WBO yo'nalishlarida TOP-10 likdan joy egallab kelmoqda. SHahram esa WBA yo'nalishida kuchli TOP-5likda, IBF yo'nalishida esa TOP-15talikda.
O'zbekiston professional boks federaciyasi bosh kotibi Bekzod Solievning xabariga ko'ra, joriy yilning iyun oyida SHohjahon Ergashevning navbatdagi professional boks musobaqasi Toshkent shahrida tashkillashtirish rejalashtirilmoqda. Mazkur jang IBF yo'nalishida chempionlikka asosiy davogar bokschilardan biri bo'lgan avstraliyalik Liam Paroga qarshi o'tkaziladi.
Erta tongda boshlanadigan Ramires-Teylor jangi kimning g'alabasi bilan yakunlanishidan qatiy nazar, Las-Vegasdagi murosasiz musobaqa hamyurtlarimiz SHohjahon Ergashev va SHahram G'iyosov intilayotgan professional boks “cho'qqisi”da qachonlardir O'zbekiston bayrog'i hilpirashi kutilayotgan kunlarni yaqinlashtirayotganligi rost bo'lsin.
To'lqin RO'ZIEV
Fikrlar