Xizmat ko'rsatgan murabbiy Konisbekovning Qozog'iston fuqaroligini olganiga munosabat bildirdi

Konisbekov O'zbekiston chempionatining yarim finalida jahon chempioni Asadxo'ja Mo'ydinxo'jaevga hakamlarning bahsli qarori bilan yutqazib qo'ygandi. Qozog'istonda xizmat ko'rsatgan murabbiy, taniqli boks mutaxassisi Jumabek Omurzakov Kazinform agentligi muxbiriga bergan intervyusida Aman Konisbekov haqida fikr bildirdi.

— Yigit bizning mamlakatga keldi, lekin bu erda hech kim unga terma jamoada joy kafolatlamagan. O'zini mehnati bilan hammasini isbotlashi kerak. Mahalliy bokschilardan bir bosh baland ekanini amalda ko'rsatishi lozim. Bu uning qo'lidan keladimi? Bu endi katta savol. Boshqa tomondan olib qarasak, Baxit Sarsekbaev men aytgan narsani o'zini kuchi va intilishi bilan isbotlagan. Uning O'zbkistondan Qozog'iston terma jamoasiga o'tishi omadli bo'lgandi. Baxit Qozog'iston sharafini himoya qila turib, Osiyo chempioni, Osiyo o'yinlari g'olibi hamda eng muhimi Olimpiada chempioni bo'lgan edi. Sarsekbaevning Qozog'istonga kelgan ilk paytlarini kechagidek yaxshi eslayman. U ishonchni mushtlariga jamlay olgan va buning natijasida ringda raqiblaridan katta ustunlikka erishgandi. Aman Konisbekov Baxitning muvaffaqiyatini takrorlay oladimi? Bu savolga faqat vaqt javob beradi, — dedi Omurzakov.

Omurzakovning so'zlariga qaraganda, so'nggi yillarda O'zbekiston boksi oldinga katta qadam tashlagan.

— Qo'shni mamlakatda boksda juda katta etibor qaratilmoqda. Ular o'z vatanlari va sporti yo'lida hamjihatlikda harakat qilishyapti. Bu borada O'zbekistondan o'rganadigan jihatlarimiz ko'p, — deya fikriga yakun yasadi Qozog'istonda xizmat ko'rsatgan murabbiy.