Xushxabar! Tokioga 10 nafar dzyudochi boradi. Olimpiadada jamoaviy bahslarda ham ishtirok etamiz

Jahon chempionatidan keyingi reyting o'rinlari bo'yicha 9 nafar (7 erkak, 2 ayol) dzyudochimizning Tokioga borishi kutilayotgandi. SHuningdek, qitaviy kvota va jamoaviy mikst bahslariga beriladigan yo'llanmadan ham umidimiz yo'q emasdi. 

Bugun biroz avval reyting o'rinlari rasman oshkor qilindi. Avvaldan kutilgan dzyudochilarimiz Tokio-2020 Olimpiadasi licenziyasini qo'lga kiritishdi va eng muhimi, biz umid qilgan holat ham ro'y berdi. Farangiz Hojievaga qitaviy kvota taqdim etildi. Endi Tokioga 7 erkak va 3 nafar ayol dzyudochi bilan boramiz. 

Eng quvonarlisi, dzyudo vatanida o'tajak to'rt yillikning eng nufuzli musobaqasi jamoaviy mikst bahslarida endi O'zbekiston terma jamoasi ham ishtirok etadi. IJF 130 davlat orasidan bor yo'g'i 12 tasiga ushbu imkoniyatni taqdim etdi. Tarixda ilk bor bu imkoniyatga ega bo'ldik. 

SHunda O'zbekiston dzyudo terma jamoasining umumiy licenziyalari soni 11 ta (10 yakkalik + 1 juftlik )ga etdi.