Yoshlarga Navro'z tuhfasi

Navro'z umumxalq bayrami arafasida, aniqrog'i 20 mart kuni Mirzo Ulug'bek tumanidagi “Katta Qorasuv” mahallasi hududida yangi yopiq turdagi basseyn foydalanishga topshirildi.

Jismoniy tarbiya va sportni rivojlantirish jamg'armasi mablag'lari hisobiga barpo etilgan obektning ochilish marosimida Jismoniy tarbiya va sport vaziri Dilmurod Nabiev, davlat va jamoat tashkilotlari vakillari, sportchilar, yoshlar ishtirok etdi.

Mazkur majmuani qurish uchun jamg'arma mablag'lari hisobidan 5 milliard so'm ajratildi. O'lchami 11x25 metr bo'lgan yopiq suzish havzasida murabbiylar hamda suv sporti bilan shug'ullanuvchilar uchun yuvinish, kiyinish, dam olish, tibbiyot xonalari, suvning tarkibi, sifati nazorat qilinadigan laboratoriya va eng muhimi, bolalar va o'smirlar o'rtasidagi musobaqalarni kuzatib borish uchun tomoshabinlarga o'rindiqlar ham mavjud.

Mirzo Ulug'bek tumani 1-sonli bolalar-o'smirlar sport maktabi ixtiyoriga berilgan mazkur inshootda bir kunda 120 nafar o'g'il-qiz suzish sporti sirlarini o'rganishi mumkin. Qolaversa, yangi majmua yoshlarning mashg'ulotlaridan bo'sh vaqtlarida aholiga ham xizmat ko'rsatishi ko'zda tutilgan.

Yana bir etiborga molik jihat, bolalar va o'smirlar sport maktabiga jamg'arma tomonidan 52 turdagi 70 million so'mlik sport jihozlari ham topshirildi.