Zagreb Gran-prisi. Lutfullaevda qimmatli 700 ochko, terma jamoamiz esa peshqadamlar safida!

Kecha erkaklar -60 va -66 kg, ayollar -48, -52 hamda -57 kg vazn toifalarida medallar hamda Tokio-2020 Olimpiadasining muhim reyting ochkolari uchun tatamiga chiqishdi. 

Quvonarlisi, -60 kg vaznda yurtimiz sharafini himoya qilgan dzyudochimiz SHarofiddin Lutfullaev barcha raqiblarini mag'lubiyatga uchratib, uzoq kutilgan oltin medalni terma jamoamiz hisobiga qo'shib qo'ydi. U shuningdek, qimmatli 700 reyting ochkosiga ham ega bo'ldi. 

-66 kg vaznda o'z imkoniyatini sinovdan o'tkazgan Muhriddin Tilovov esa bronza medali uchun kechgan bellashuvda franciyalik Kilian de Blouchga uchta shido bahosi bilan yutqazib qo'ydi. Vaholanki, Muhriddin ukrainalik afsonaviy dzyudochi Georgiy Zantarayani mag'lub etishning uddasidan chiqqandi. 

Birinchi kungi bahslardan so'ng O'zbekiston terma jamoasi bitta oltin va beshinchi o'rin bilan umumjamoa hisobida kuchli uchlikdan joy olgan. Ikkinchi o'rindan joy olgan Qozog'iston terma jamoasi hisobida ham xuddi bizda bo'lgani kabi bitta oltin va beshinchi o'rin bor. 

Bittadan oltin va kumush medalga ega Yaponiya terma jamoasi hozircha peshqadam. Kanada va ispaniyalik dzyudochilar ham kechagi kun bahslarida bir nafardan chempionga ega bo'lishdi.