Zominda o'zbek jang sanati bo'yicha mamlakat chempionati o'tkazildi

Milliy urf odatlarimiz, qadriyatlarimiz, ota-bobolarimizdan bizgacha etib kelgan boy manaviy merosimiz va albatta, o'ziga xos va o'xshashi yo'q jang usullarini o'zida mujassamlashtirgan
O'zbek jang sanati bugun yoshlarimizning sevimli sport turiga aylanib borayotganini Zomin tumani mezbonlik qilgan mamlakat chempionatida ko'p sonli sportchilarning ishtirokidan ham anglash mumkin.

Sport vazirligi hamda Respublika O'zbek jang sanati federaciyasining yillik taqvim rejasidan joy olgan mazkur mamlakat chempionatida 1200 nafar sportchilar "Temuriylar bellashuvi", "Qilich-qalqon", "Kamondan o'q uzish" hamda "Nayza uloqtirish" yo'nalishlarida o'zaro kuch sinashishdi.

Zomin tumanining go'zal tabiat qo'ynida o'tgan musobaqaning dastlabki kun bellashuvlarida  700 nafarga yaqin o'smirlar va yoshlar har bir yo'nalishda 8 tadan vazn toifasida  g'oliblik uchun kurash olib borishdi. 

Qiziqarli  o'tgan uchrashuvlarning birinchi kunida eng munosib deb topilgan yosh atletlar g'olib va sovrindorlar qatoridan joy olishdi.

Reglamentga ko'ra, musobaqaning ikkinchi kunida kattalar o'rtasidagi "Temuriylar bellashuvi", "qilich-qalqon", "kamondan o'q uzish", "nayza uloqtirish" "ot choptirish", "ot ustida kamondan o'q uzish" "ot ustida qovoq kesish" yo'nalishlari bo'yicha bellashuvlar ham murosasiz va shiddatli tarzda davom etdi. Belgilangan har bir yo'nalishda g'oliblikni qo'lga kiritgan sportchilar shoh supasiga ko'tarilib, diplom va medallar bilan taqdirlanishdi.

CHempionatning yakuniy natijalariga ko'ra, umumjamoa hisobida faxrli birinchi o'rinni Toshkent viloyati jamoasi qo'lga kiritgan bo'lsa, ikkinchi o'rinni Andijon jamoasi egalladi. Ikkita uchinchi o'rin esa Jizzax va namanganlik atletlarga nasib etdi.

Ilhom RAHMONOV tayyorladi