Zverev o'z vatanida faoliyatidagi 20-sovrinni qo'lga kiritdi

Mukofot jamg'armasi 1,981,470 evroni tashkil etgan turnir mezbonlar vakili Aleksandr Zverevning g'alabasi bilan nihoyasiga etdi. Dunyoning 19-raketkasi bo'lib turgan germaniyalik hal qiluvchi final uchrashuvida ATP reytingining 57-pog'onasidan joy olgan serbiyalik Laslo Djereni mag'lubiyatga uchratdi - 7/5, 6/3.

Tennischilarning o'zaro uchrashuvlaridagi hisob yiriklashdi - 3:0. Bir soatu 50 daqiqa davom etgan bahsda ikkala tennischi ham 3 tadan eys zarbasini amalga oshirdi. Breyklar 3 ga 1 ko'rinishda Zverev foydasiga bo'ldi. 

Gamburg turniridagi bir haftalik mehnat Zverevga 500 reyting ochkosi va 342,500 evro mukofot puli keltirdi. Bu olmon tennischisi uchun faoliyatidagi 20-sovrin bo'ldi.