Магомед Анкалаев ва Алекс Перейранинг гонорарлари маълум қилинди

Оқшомнинг асосий жанги ярим оғир вазн тоифасида амалдаги UFC чемпиони россиялик 33 ёшли Магомед Анкалаев ҳамда ушбу камарнинг собиқ соҳиби бразилиялик 38 ёшли Алекс Перейра ўртасида ўтказилади. Ушбу жанг Перейра учун реванш мақомида бўлади.  

Маълумотларга кўра, Анкалаев бугунги жангдан кафолатланган, ҳомийлик гонорари ва бошқа тўловларни ўз ичига олган ҳолда тахминан 2,5 миллион доллар, унинг рақиби Перейра эса 2,82 миллион доллар ишлаб олади.

Эслатиб ўтамиз, Анкалаев ва Перейра ўртасидаги биринчи жанг шу йилнинг 9 март куни UFC 313 турнир доирасида бўлиб ўтганди. Беш раунд тўлиқ давом этган жанг ҳакамларнинг якдил қарори билан Магомеднинг ғалабаси билан якунланган эди.