Нодирбек Якуббоевда яна ғалаба, у 61th Rubinstein Memorial чемпионлигига яқин!

Ўз тарихида 61-маротаба ташкил этилаётган ушбу мусобақа 7 та гуруҳда ўтказилаётган бўлиб, кучлилар жам бўлган “ALREH” гуруҳида ҳамюртимиз, халқаро гроссмейстер Нодирбек Якуббоев ҳам бош соврин учун кураш олиб бормоқда. Ушбу гуруҳдан 10 нафар гроссмейстер ўрин олган бўлиб, ғолиб 9 тур натижасига кўра аниқланади. 

“ALREH” гуруҳи иштирокчилари: Аравиндҳ Читҳамбарам (Ҳиндистон) – 2723, Игорь Коваленко (Украина) – 2676, Майкл Адамс (Англия) – 2663, Нодирбек Якуббоев (Ўзбекистон) – 2663, Маттиас Блуебаум (Германия) – 2660, Давид Навара (Чехия) – 2650, Радослав Войташек (Польша) – 2648, Матеуш Бартел (Польша) – 2576, Павел Тецлаф (Польша) – 2571, Ян Климковски (Польша) – 2517

Қувонарлиси, 7-турда Нодирбек Якуббоев яна бир муҳим ғалабани қўлга киритди. Гроссмейстеримиз ўйин стартида ўз фарзинини руҳ ва филга алмаштириб юборганига қарамай, якунда нафақат дуранг, балки ғалабани ҳам юлиб олди. Якуббоев англиялик тажрибали гроссмейстер Майкл Адамсни мағлубиятга учратди. Фарзинсиз фарзинли рақибни ютиш жуда кам ҳолатда учрайди. Бу билан Нодирбек ўз очколарини 5,5 тага етказиб, якка пешқадамлигини давом эттирмоқда. 

Бугун ҳамюртимиз 8-турда энг яқин таъқибчиси, 4,5 очко билан қўшимча кўрсаткичларга кўра 2-ўринни эгаллаб турган германиялик гроссмейстер Маттиас Блубаумга қарши баҳс олиб боради. Учрашув бизнинг вақт билан соат 18:15'да бошланади. Агар Нодирбек бугун ғалаба қозона олса, муддатидан олдин Польша турнири чемпиони бўлиши мумкин.