Универсиаданинг тўртинчи кунини битта медаль билан якунладик

Мусобақанинг тўртинчи куни доирасида Ўзбекистон делегацияси аъзолари сузиш, стол тенниси, таэквондо ва теннис баҳсларида иштирок этди.

Қувонарлиси, таэквондо терма жамоамизнинг 58 кг вазн тоифасидаги вакили Шамсиддин Қурбонов шоҳсупадан жой эгаллади. Ҳамюртимиз дастлабки босқичда покистонлик Муҳаммад Тайябни 2:0, нимчорак финалда Туркия термаси аъзоси Энес Капланни 2:1 ва чорак финал босқичида япониялик Шоки Асадани 2:0 ҳисобида таслим этди. Финал йўлида кечган Таиланд вакили Сиравит Маҳамадга қарши баҳсда Шамсиддин имкониятни бой бериб қўйди, аммо шундай бўлса-да, у делегациямиз ҳисобига бронза медалини тақдим этди.

Шу тариқа, таэквондочиларимиз ҳисобида иккинчи медал қўлга киритилди. Кеча 57 кг вазнли Мадина Мирабзалова ҳам мусобақада учинчи натижани қайд этганди.

Ҳозирда Ўзбекистон делегациясининг Универсиададаги медаллари сони 7 тани ташкил қилмоқда: 2 та олтин, 3 та кумуш ва 2 та бронза.