Шоҳжаҳон Эргашевнинг рақиби ўзгарди, у ҳинд боксчисига қарши рингга чиқади + ПОСТЕР

Хабар берганимиздек, чарм қўлқоп устамиз Самарқанд шаҳридаги Family Park мажмуасида ташкил этилиши керак бўлган проф бокс оқшомининг асосий жангида конголик 32 ёшли Мардочее Кувеса Катомбега қарши рингга чиқиши лозим эди. 

Аммо бу турнир белгиланган муддатда ўтказилмади ва янги санага кўчирилди. 4 январь куни Самарқандда ташкил этиладиган бокс оқшомининг асосий жангида Эргашевнинг ўзи рингга чиқади, фақат бошқа рақибга қарши. У ўша куни ҳиндистонлик Гурприт Сингҳга қарши жанг ўтказади. Бу бокс турнирини Шоҳжаҳон Эргашевга тегишли Top Seven Fighters компанияси ташкил қилмоқда.  

Маълумот учун, 33 ёшли Шоҳжаҳон Эргашев ҳозиргача 27 та жанг ўтказиб, 25 ғалаба ва 2 мағлубият қайд этган. Гурприт Сингҳ эса 11 ғалаба (3 нокаут), 3 мағлубият ва 1 дурангга эга. Сингҳ охирги жангини 2024 йилнинг 30 ноябрь куни ўз ватанида ҳамюрти Дигари Манешга қарши ўтказиб, иккинчи раундда техник нокаут эвазига зафар қучган. Эргашев эса сўнгги жангини февраль ойида Фарғонада угандалик Жунжу Пауэрга қарши ўтказиб, биринчи раунддаёқ техник нокаут эвазига ғалаба қозонганди.