Яна икки таниқли бокс юлдузи Тошкентга келади

WBC матбуот хизмати тадбирга ташриф буюрадиган яна икки таниқли собиқ боксчи номини эълон қилди.

Унга кўра, биринчи ярим ўрта вазн тоифасида мексикалик собиқ WBC чемпиони Хулио Сезар Чавес юртимизга келади. У 115 та профессионал жанг ўтказган ва уларнинг 107 тасида ғалаба қозонган, олтита жангда мағлуб бўлган ва яна икки жанг дуранг билан якунланган. У фаолияти давомида Оскар де ла Хойя, Костя Цзю, Хосе Луис Рамирес каби боксчилар билан жанг қилган.

Бундан ташқари, енгил вазн тоифасида бир нечта йўналишларда собиқ жаҳон чемпиони, панамалик 72 ёшли Роберто Дюран ҳам Тошкентдаги тадбирда иштирок этади. У фаолияти давомида 119 та жанг ўтказган, уларнинг 103 тасида ғалаба қозонган, қолган 16 та жангда эса мағлуб бўлган.