29 янв 15:17
Янгиликлар

Бокс/ММА

48 ёшли Йоэль Ромеронинг BKFC лигасидаги жанги бекор қилинди

Фахрий яккакураш устаси Йоэль Ромеро 7 февраль куни қўлқопсиз жангларни ўз ичига олган KnuckleMania VI турнирида чемпионга қарши рингга чиқиши керак эди.

Унинг ярим оғир вазн тоифасида BKFC чемпиони Лоренсо Хант билан тўқнаш келиши белгиланганди. Лига вакиллари 48 ёшли кубалик тумовга чалиниб, сафдан чиққанини расман маълум қилишди. Унинг ўрнини эса ўрта вазн тоифасида BKFC чемпиони Дейв Манделл эгаллади. У захира варианти сифатида ўрта вазнда Хант билан жанг ўтказади. Бу жангда ўртага ҳеч нарса қўйилмайди.

Хант ва Манделл ўртасидаги жанг тадбирнинг иккинчи муҳим воқеаси бўлади. Шоунинг асосий жанги эса оғир вазн тоифасида Бен Ротвелл ва Андрей Орловский ўртасида бўлиб ўтади. Бу жанг чемпионлик мақомида бўлади.

Маълумот учун, Йоэль Ромеро BKFC лигасидаги дебютини ўтган йилнинг сентябрь ойида муваффақиятли ўтказганди. Ўшанда у америкалик Тео Дукасни иккинчи раундда техник нокаут эвазига мағлуб этганди. 10 январь куни эса "Soldier of the Lord" RAF 5 кураш турнирида Стивен Бучананга муддатидан олдин ютқазиб қўйган эди.