"Ал Насср" энди Бенземага кўз тикди

Манбанинг хабарига кўра, Криштиану Роналду ортидан унинг собиқ жамоадоши Карим Бензема Саудия Арабистонига таклиф этилди.

Осиё вакилининг жиддий қизиқишига қарамай, франциялик форвард Испанияни тарк этиш ниятида эмас ва таклифни рад этиши кутилмоқда.

Аллақачон португалиялик юлдуз билан катта битим тузган "Ал Насср" трансферлар бозорида кўпроқ марраларни кўзламоқда. Клуб аввалроқ ПСЖ ҳимоячиси Серхио Рамос, "Барселона" ярим ҳимоячиси Серхио Бускетс ва Бенземанинг Мадрид клубидаги жамоадоши Лука Модричга оғиз солган эди.

Бироқ Бенземани қўлга киритишга бўлган ҳар қандай уриниш бефойда кўринади. 2022 йилда "Олтин тўп" соврини соҳибига айланган ҳужумчи 2009 йилда "қироллик клуби" аъозосига айланганидан буён амалдаги Испания Ла Лигаси ва Европа Чемпионлар Лигаси ғолибига жуда боғланиб қолган. У футболчилик фаолиятини пойтахт клубида якунламоқчи.

35 ёшли футболчи "Реал" билан шартномасини яна бир йилга узайтириб, 2024 йилнинг ёзига қадар жамоада қоладиган бўлди. Томонлар шартнома шартлари борасида келишиб бўлишган. Яқин кунларда янги битим расман имзоланади.

Карим Бензема жорий мавсум "Реал" учун 15 та ўйинда майдонга тушди ва 10 та гол уриб, 1 та ассист қайд этди. Форвард жароҳати туфайли Қатарда бўлиб ўтган мундиални ўтказиб юборди.