Албатта ўқинг! Нурмагомедов vs Макгрегор. Кимнинг имконияти юқори? (сўровноманинг давоми)

Дарҳақиқат, бу жангнинг ғолибини аввалдан башорат қилиш жуда ҳам қийин ёхуд ким кучли эканлиги борасида фикр билдириш! Биз юртимиздаги кўзга кўринган спорт журналистлари, спортчи ва мураббийлар, санъат аҳли вакилларининг фикр ва мулоҳазаларини эътиборингизга ҳавола этишни давом эттирамиз. 

Сардор Тошхўжаев – Миллий Олимпия Қўмитаси Шарқ яккакураши ва жанг санъати департементи мутасаддиси

- Аввало, ким ғалаба қозонади, бу Яратганнинг ўзига аён. Шахсан мен Хабиб Нурмагомедовнинг ғалабасини тахмин қиляпман. Сабаби, Хабиб ҳали ёш, мағлубиятга учрамаган. Қолаверса, унинг муваффақиятлари олдинда. Конор Макрегор эса, мағлубият аламини тотиб кўрган. Фаолиятида нокаутга учраган ҳолатлари ҳам бўлган. Тўғри, бу фактлар нисбий тушунча холос. Бироқ, ушбу омиллар ҳам қайсидаир маънода Хабибнинг устунлик томонларидан бири, деб ўйлайман. Яна бир ҳолатни алоҳида таъкидлаб ўтиш лозимки, ирландиялик спортчи кўпроқ “шоу” лар билан овора бўлди. Бундай даражадаги спортчи жисмоний ҳолатини ушлаб туриш учун кўпроқ ўз иши билан машғул бўлиши керак, назаримда.   

Қудратилло Абдуқаҳҳоров - WBC silver камари соҳиби

- Бу жангни жуда узоқ кутдик. Албатта, Хабиб Нурмагомедовга мухлислик қиламан. Унинг ғалаба қозонишига ишонаман. Олға, Хабиб!

Ғайрат Усмонов - хонанда

- Имкониятлар 50/50! Бу спорт турини кузатиб бораман ва ҳар иккисининг жанг олиб бориш услублари ёқади. Албатта, Хабиб Нурмагомедовга ишқибозлик қиламан. Лекин Конор Макгрегорда тажриба юқорироқ, деб ўйлайман. Конорга тажриба асқотиши мумкин.

Азизбек Абуғофуров - WBC silver камари соҳиби

- Тўғриси, бокс бўлганида ишонч билан ким ютишини айтишим мумкин эди. Шундай бўлсада, Хабибни қўллаб-қувватлайман ва унинг ғалаба қозонишини хоҳлардим.

Аҳмаджон ЭШМАТОВ ёзиб олди, ўз мухбиримиз