Андрей Штурбабинни табриклаймиз!

Спортга беэътибор бўлмаган инсонлар Андрей Штурбабинни таниқли дзюдочиларимиз, олимпия ўйинларининг уч карра бронза медали совриндори, икки карра жаҳон чемпиони, Осиё ўйинлари ғолиби Ришод Собиров, Рио-2016 Олимпиадасининг бронза медали соҳиби Диёрбек Ўразбоевнинг мураббийи сифатида жуда яхши билишади, танишади ва ҳурмат қилишади. Ўзи ҳам спортчи сифатида Атланта-1996 ва Сидней-2000 Олимпиадасида иштирок этган. 

Штурбабин бир неча йил давомида терма жамоа мураббийи сифатида фаолият юритган. Маълум муддат Эрон терма жамоасига устозлик қилган. Бугунги кунда унинг фарзанди Артём Штурбабин ҳам ота изидан бориб, айтишга арзигулик ютуқларни қўлга киритмоқда. Ўтган йили кичик Штурбабин Хитойнинг Ухань шаҳрида ўтказилган Бутунжаҳон армия ўйинларида -66 кг вазн тоифасида олтин медални қўлга киритган эди. 

Тажрибали мураббий Андрей Штурбабиннинг кўп йиллик хизматлари ҳукуматимиз томонидан муносиб тақдирланган. Штурбабин Ўзбекистонда хизмат кўрсатган спорт устози, "Дўстлик" ордени ҳамда "Шуҳрат" медали билан мукофотланган. 

Фурсатдан фойдаланиб, бугун таваллуд кунини оиласи даврасида нишонлаётган Андрей Штурбабинни Ўзбекистон дзюдо федерацияси номидан муборакбод этамиз.