Анхольтцдаги Жаҳон кубогида фақат эмланган биатлончиларга рухсат берилади

Бу Пекиндаги Қишки Олимпия ўйинлари олдидан ўтказилаётган охирги босқич ҳисобланади.

Халқаро биатлон иттифоқи (IBU) матбуот хизматининг хабарига кўра, Италиядаги босқичда фақат эмлашнинг тўлиқ курсидан ўтган, шунингдек, коронавирусдан тузалган биатлончилар иштирок этишлари мумкин. Италиянинг амалдаги миллий қоидалари мана шуни талаб қилмоқда.

Қайд этилишича, Европа Иттифоқида тан олинмаган вакциналар билан эмланган спортчилар, жумладан, Россиянинг Спутник V вакцинасини олган биатлончилар ҳам Анхольтцда қатнашишлари мумкин. Бироқ улар ҳар 48 соатда ПЦР-тестларини топширишлари керак бўлади.

Анхольтцдаги меҳмонхона фақат тўлиқ эмланган спортчилар, мураббийлар ва ходимларни қабул қилади.

IBU Жаҳон кубогида иштирок этаётган биатлончиларнинг 98 фоизи, шунингдек, мураббийлар ва ходимлар аллақачон COVID-19 га қарши вакцина олгани ёки коронавирус билан касал бўлганлигини таъкидлади.