АҚШ Сенатига профессионал боксни UFC модели асосида ислоҳ қилиш бўйича қонун лойиҳаси киритилди

Ушбу лойиҳа профессионал боксни ҳозирда UFC`да қўлланилаётган моделни жорий этиш орқали ислоҳ қилишга қаратилган. Унинг ташаббускорларидан бири UFC раҳбари Дана Уайт ҳисобланади.

Қонун лойиҳасининг асосий мақсади "Бирлашган бокс ташкилотлари"ни (United Boxing Organizations — UBO) яратишдан иборат. Улар жангчилар билан эксклюзив шартномалар имзолаш, рейтингларни мустақил юритиш ва ўз чемпионлик унвонларини ўйнаш ҳуқуқига эга бўладилар. Муаллифларнинг фикрича, бундай ёндашув ҳозирда чемпионлик унвонлари ва рейтингларнинг тарқоқ тизими туфайли қийинлашган йирик жангларни ташкил этишни рағбатлантиради.

Лойиҳа муаллифларидан бири, республикачи сенатор Тед Круз шундай деди: "Йигирманчи асрда бокс бизга бутун мамлакатни ҳаяжонга солган машҳур шахслар ва чемпионлик жангларини тақдим этган... Аммо бугунги кунда жуда кўп йирик жанглар ўтказилмай қолмоқда, чунки спорт тарқоқ тизим гаровига айланган. Бу қонун шов-шувли жангларни қайтаради ва боксни яна буюк қилади".

Ушбу қонун лойиҳасининг биринчи версияси аввалроқ Конгрессда тингловлардан ўтган эди, бироқ Сенат варианти ундан бир қатор фарқларга эга. Хусусан, эндиликда боксчининг UBO билан тузадиган биринчи шартномаси уч йилдан ортиқ муддатга бўлиши мумкин эмас. Шунингдек, Сенат версияси UBO`га бошқа санкцияловчи ташкилотларнинг унвонлари ва рейтингларини тан олишга рухсат беради ҳамда вазн тоифасида битта унвон билан чекланиш қоидасини бекор қилади.

Аввалроқ профессионал боксчи ва Муҳаммад Алининг набираси Нико Али Уолш қонун лойиҳасига қарши очиқ чиқиш қилган эди. "Али қонуни оддий тамойилга асосланган эди, — деди у тингловларда. — Жангчиларни назорат қилувчи шахслар шу жангчилар боғлиқ бўлган бутун бозорни ҳам назорат қилмасликлари керак. Манфаатлар тўқнашуви ва эксплуатациянинг олдини олиш учун ажратиш мавжуд. Янги қонун бир субъектга промоутер, менежер ва ташкилотчи сифатида ишлашга рухсат бериб, бу тамойилни барбод қилади. Бу мустақилликни йўқ қилади".

Эндиликда қонун лойиҳаси бир неча босқичли келишув ва тузатишлар киритиш жараёнидан ўтиши керак (бу январm ойи бошигача амалга оширилиши лозим). Агар Сенат якуний версия учун овоз берса, у имзолаш учун президент Трампга юборилади. Қонун имзоланганидан 180 кун ўтгач кучга киради.