Арина Соболенко Штутгартда муваффақиятли старт олди

Дунёнинг еттинчи ракеткаси бўлиб турган Арина Соболенко мусобақадаги иштирокини ғалаба билан бошлади. Беларуслик теннис маликаси 66 дақиқа давом этган учрашувда рейтингнинг 40-поғонасидан жой олган хитойлик Чжан Шуайни 6/2, 6/2 ҳисобларида мағлуб этди. 

Баҳс давомида 22 ёшли Соболенко 3 та, 32 яшар Шуай эса 1 та эйс зарбасини ижро этди. Теннисчиларнинг ўзаро учрашувларидаги ҳисоб мувозанати тикланди - 1:1. Арина Porsche Tennis Grand Prix турнирининг иккинчи даврасида германиялик Анна-Лена Фридзамга қарши кортга чиқади. Фридзам биринчи босқичда норвегиялик Ульрикке Эйкеридан устун келди - 6/2, 6/0.