Арман Царукян бир ҳафтадан кейин жанг қилади, рақиб маълум + ПОСТЕР

19 сентябрь куни Россия Федерацияси пойтахти Москва шаҳрида жиу-житсу бўйича ACBJJ 18 турнири бўлиб ўтади. Оқшом доирасида UFC жангчиси Арман Царукян ҳам ўз жангини ўтказади. Арманистонлик аралаш яккакураш устасининг рақиби енгил вазнда собиқ WEC ва UFC чемпиони америкалик Бенсон Хендерсон бўлади.

Турнир ташкилотчилари расман ушбу жангни эълон қилишди. 41 ёшли Хендерсон сўнгги жангини 2023 йилнинг март ойида ММА йўналишида ўтказганди. Ўшанда у россиялик Усман Нурмагомедовга Сан-Хоседа ўтган Bellator 292 турнирида мағлуб бўлган эди. Усман тажрибали рақибини биринчи раунднинг ўзида ортдан бўғиб қўйганди. Ўша йилнинг декабрида Бенсон ҳамюрти Энтони Петтисга қарши каратэ қоидалари асосидаги Karate Combat лигасида жанг қилди. Трилогияда "Шоутайм" Петтис ҳакамларнинг якдил қарори билан ғалаба қозонди. Шу йилнинг май ойида Хендерсон ва Петтис ММА бўйича GFL лигасида ўзаро жанг ўтказишлари керак эди, аммо бу лига туғилмай "ўлганди". Аниқроғи, GFL битта ҳам турнир ўтказмай, бошланмаган фаолиятини якунлаган эди.  

Арман Царукян эса шу йилнинг ўзида грепплинг бўйича иккита жанг ўтказиб улгурди. Дубайда ўтган Karate Combat 54 турнирида россиялик Маккашарип Зайнуковни очколар ҳисобига кўра таслим этди. Москвада ўтган ADXC 10 турнирида эса бразилиялик Патрики Фрейредан устун келди. Россия шарафини ҳимоя қилаётган 28 ёшли Арман 22 ноябрь куни Қатар пойтахти Доҳа шаҳрида ташкил этиладиган UFC турнирида октагонга қайтади. Оқшомнинг асосий жангида айнан Царукян Янги Зеландия вакили Дэн Хукерга қарши октагонга чиқади.