Australian Open 2018: Мукофот жамғармаси ва чемпионлар учун кафолатланган сумма

Кўпчиликни ушбу мусобақанинг соврин жамғармаси ҳамда чемпион теннисчилар қўлга киритадиган мукофот пуллари қизиқтиради. Ўтган йилги билан таққослаганда, турнирнинг мукофот жамғармаси 10 фоизга ошди.

Бу йилги мусобақанинг умумий мукофот жамғармаси 55 миллион Австралия доллари (42,817 млн АҚШ доллари)ни ташкил қилади. 28 январь куни якунланадиган турнирнинг ҳам аёллар, ҳам эркакларнинг яккалик баҳсларида чемпион бўлган ракетка усталари ўз ҳамёнларини 4 миллион Австралия долларига бойитиб олишади. 

Бу борада Australian Open турнири биргина US Open мусобақасига ён беради. АҚШ Очиқ чемпионатининг умумий соврин жамғармаси 50 миллион долларни ташкил қилади. Уимблдон-2017 ташкилотчилари теннисчиларга 42 миллион доллар тўлаб беришганди. "Ролан Гаррос"да бу сумма 36 миллион еврони ташкил қилганди.

Эслатиб ўтамиз, Australian Open мусобақасининг амалдаги ғолиблари швейцариялик Рожер Федерер ҳамда америкалик Серена Уильямс ҳисобланади.