Australian Open 2023. Арина ва Елена қанча пул ишлаб олишди?

Бир дақиқаси кам икки ярим соат давом этган ҳал қилувчи финал учрашувида дунёнинг бешинчи ракеткаси, беларуслик Арина Соболенко WTA рейтингида 25-ўринни эгаллаб турган қозоғистонлик Елена Рибакинани 4/6, 6/3, 6/4 ҳисобларида мағлуб этиб, Аustralian Open 2023 чемпионига айланди.

Теннисчиларнинг ўзаро учрашувларидаги баҳсларда Арина ҳисобни янада йириклаштирди - 4:0. Статистикага эътибор қаратидиган бўлсак, Соболенко 18 та эйс, 7 та қўшхато ва 3 та брейк-пойнт қайд этди. Рибакина эса 9 та эйс, 1 та қўшхато ва 2 та брейкка эга бўлди. 

Арина Соболенко фаолиятида илк бор "Катта Дубулға" турнирида бош совринга эга чиқди. Душанба куни эълон қилинадиган янги рейтингда у дунёнинг иккинчи ракеткаси бўлиб олади. 

Беларуслик теннис маликаси Мельбурндаги икки ҳафталик меҳнати учун 2000 рейтинг очкоси ва 2 миллион 975,000 Австралия долларига эга бўлди. Рибакина эса 1300 рейтинг очкоси ва 1 миллион 625,000 минг ишлаб олди.